Дээврээс унжих болор дуслууд инээлдээд
Дэлгүүр хэсэг тухай бүсгүйчүүд яриа дэлгээд
Болзоонд яарах залуугийн шинэхэн сарнайн анхилд
Бодлоос хэн нэгэн тэнгэрт тэмүүлсэн хавар цагийн анир

Ахуйгаас ангид мэдрэхгүй минь
Ахин дахин санаа алдана...
Тохуурхал дунд эргэлдсэн
Тоглоомын төдий хийсвэр нэгэн амь...

Арьсан дээгүүр минь гүрвэлийн сүнснүүд хөөцөлдөн тоглов уу

Амьдрал хэмээх жижиг өрөөний хаалга цонх нь олдохгүй төөрөв үү

Андын сэтгэл нударган дотроо салаавч хадгалав уу

Аз жаргалын тариаланг хар хэрээдээс хамгаалах ноорхой мануухай салхинд бүжив үү

Заримдаа “бодол юүлэх төхөөрөмж” минь
Загасгүй нууранд шидсэн дэгээ шиг
Хаая “цус юүлэх төхөөрөмж” минь
Хальтардаг гутлаар мөсөн дээгүүр тэших шиг...

Гацууур мод, бэлэг сэлт

Ганган гутал бэлэн эсэх

Шинэ жил тэмдэглэх тухай

Шилэн тирко авах тухай

Шинэ оны эхний өглөө
Ширээн доор хэвтэх 
Дарсны бөглөө гунигтай...

Ажил дээр оройжин л суулаа

Аягатай кофе

Дуусахад ганцаардав